Willkommen auf den Seiten des Auswärtigen Amts

Deklarata për shtyp e Kancelares Federale Angela Merkel në konferencën e përbashkët me Kryeministrin e Republikës së Shqipërisë Edi Rama

22.11.2017 -

Deklarata për shtyp e Kancelares Federale Angela Merkel
në konferencën e përbashkët me Kryeministrin e Republikës së Shqipërisë Edi Rama

Zonja dhe zotërinj, gëzohem që Kryeministri shqiptar është sot - dhe me kënaqësi mund të them
sërish - në Gjermani, dhe kjo në një kohë të rëndësishme.
Na u desh shumë kohë për krijimin e qeverisë, por tani mund të punojmë përsëri si duhet. Më lejoni
të them se kemi një marrëdhënie dypalëshe shumë të ngushtë, gjë për të cilën shpreh falënderimin
tim. Kryeministri sapo vjen nga Parlamenti. Dhe tani do të të vijojmë me diskutimin tonë.
Kemi patur jo vetëm përvjetorin 30-të të bashkëpunimit ekonomik gjermano-shqiptar për zhvillim në
vitin 2018 - Gjermania vazhdon të jetë akoma shumë e angazhuar në këtë kontekst - por do të flasim,
në radhë të parë, për të ardhmen e rajonit, ashtu sikurse edhe për Samitin e Ballkanit Perëndimor në
datën 17 maj. Mendoj se të dy duhet të falënderojmë shumë presidencën bullgare, e cila kujdeset në
mënyrë të paimagjinueshme duke u fokusuar në çështjet thelbësore të rajonit të saj, çka ka bërë, që
të kemi një trafik të shtuar qartazi të vizitave të politikanëve europianë drejt rajonit.
Ne do të këshillohemi, se si do të veprojmë më tej në procesin e të ardhmes europiane të Shqipërisë.
Ju e dini se është në bindjen tonë, që të gjitha shtetet e Ballkanit Perëndimor duhet të kenë një
perspektivë europiane, në mënyrë që edhe ato një ditë të mund të jenë anëtare të Bashkimit
Europian. Komisioni më 17 prill ka rekomanduar, që të nisin negociatat e anëtarësimit me Shqipërinë.
Për këtë do të konsultohemi në Këshillin Europian në fund të qershorit. Që bisedimet e anëtarësimit
të mund të hapen ka një sërë parakushtesh. Shqipëria ka punuar shumë fort për plotësimin e disa
prej tyre. Për hapjen e negociatave të anëtarësimit ka premisa të caktuara. Gjatë javëve të ardhshme,
do të krijojmë opinionin tonë përmbyllës, nëse duhen realizuar edhe gjëra të tjera, nëse është bërë
përparim i mjaftueshëm, dhe për këtë do të diskutojmë edhe me kolegët tanë europianë.
Takimi i sotëm për mua është shumë i rëndësishëm, pasi do të mësoj nga vetë Kryeministri, se si e
sheh ai plotësimin e parakushteve të ndryshme dhe se si ne do të mund ta mbështesim Shqipërinë
më tej në realizimin e reformave. Sepse këtë e kemi bërë gjithnjë e do të vazhdojmë ta bëjmë sërish.
Unë dua të them shprehimisht, se Shqipëria ka iniciuar reforma të rëndësishme dhe se sigurisht
është arritur progres. Sjell këtu në mendje verifikimin e disa qindra gjykatësve dhe prokurorëve. Për
këtë kemi folur për shembull edhe gjatë vizitës së fundit. Në këtë mënyrë do të konsolidohet i tërë
sistemi juridik në të gjithë dimensionin e integritetit dhe besueshmërisë së tij. Dimë se ky proces
verifikimi tani do të shtrihet edhe në polici. Unë vetëm mund ta inkurajoj Kryeministrin të vazhdojë
më tej në këtë rrugë.
Ka edhe fusha të tjera, për të cilat do të flasim, siç është shteti i së drejtës në përgjithësi, por dhe
lufta kundër korrupsionit dhe krimit të organizuar. Dhe ne jemi, besoj, gjithnjë të të njëjtit mendim:
të gjitha këto nuk janë për t’i bërë nder dikujt, por kanë një rëndësi të madhe për vetë Shqipërinë
dhe njerëzit e saj. Së këtejmi lindin edhe potencialet për rritje ekonomike, për besim dhe
besueshmëri në raportin me investitorët, lindin mundësitë për të ardhmen e të rinjve dhe të rejave,
të cilat duhet t’i mbajmë në fokus para gjithçkaje tjetër.
Ne do të flasim jo vetëm për Shqipërinë, por sigurisht edhe për rajonin, për situatën në Bosnjë-
Hercegovinë, Kosovën, Serbinë dhe natyrisht edhe për pritshmëritë nga Samiti në Sofje, por dhe për
takimin në korrik në Londër ku do të vijojë i ashtuquajturi Proces i Berlinit. Besoj se tashmë kemi
shënuar disa arritje lidhur me bashkëpunimin në rajon, mendoj këtu për rrjetin rinor, apo për Samitin
Digjital, i cili u mbajt para pak kohësh propozuar nga Kryeministri.
Pra përgjithësisht do të kemi një bisedë miqësore. Gjermania dëshiron të mbështesë e të ndihmojë,
në mënyrë që të shohim vërtetë ato hapa përpara, që do të na duhen për të marrë më pas një
vendim në qershor.
Edhe njëherë, përzemërsisht mirëseerdhët!